වෙසක් සුබ පැතුමක් නොවේ !!!

~~~ වෙසක් සුබ පැතුමක් නොවේ ~~~
වෙනදාට මෙන් නැතිව කෙණෙහිලි සඳ අහස් ගැබ --------- දිලෙනවා...
ඒත් පරහට වගේ ඇවිදින් කළු වලාකුළු ----------------------- රවනවා...
දවස් තුන්සිය හැටපහම ගිනි දෙමින් රැස් කර ----------------- තියපුවා...
නොයෙක් ක්‍රමයට ඇඳන් පිරුවට ලෙසින් "දන්සැල්" ------- බෙදනවා...

බුදුන්ගේ තෙමගුල ලෙසින් අපි වෙසක් සඳ දෙස ------------- බලනවා...
නමුත් දහමක නොලියවුණු ලෙස කූඩු තොරන් ද ------------ බඳිනවා...
රැයක් එළිවෙන තුරාවට එහි පහන් දල්වා -------------------- තියනවා...
පොතක් බලනට නැතුව විදුලිය රටේ දරුවන් ---------------- හඬනවා...

දිනක් දෙදිනක් ගතව යන තුරු තෙමගුළට සුබ ---------------- පතනවා...
හරිම සද්දෙට පෝය දවසට කැසට් එක බණ ------------------ කියනවා...
ලබන වසරෙදි අළුත් වෙනකම් අටපට්ටමුත් ----------------- නිවෙනවා...
මකුළුවන්ටත් වැඩක් නැතුවට කූඩුවේ දැල් --------------------- වියනවා...

දොළොස් පොහොයට මස් නොකෑවට වෙනත් දවසට ------- හපනවා...
හතර වෙනිදට ගෙදර සාදෙට කුකුලො දෙන්නෙක් ---------- ඉදෙනවා...
බුදුන්ටත් පංගුව තියා අපි පේරු දානෙත් ----------------------- පුදනවා...
පංචසීලෙට තිබෙන ආලෙට උදේ හවසට --------------------- කියනවා...

උපන් සහතිකෙ අරන් බැලුවම අපේ ආගම -------------------- බෞද්ධ...
බුදුන් ඉපදුන දේශයේ වත් නැතිය මෙහි මෙන් ------------------ ප්‍රසිද්ධ...
නමට ආගම රකින බව අපි ලොවට පෙන්වන ------------------ වැරැද්ද...
හැදෙන දවසක වෙසක් පුන් සඳ නැගෙන්නේ මෙහි ------------ කවද්ද...?